News

7月1日可以話中國人的普天同慶日子。因為港版國家安全法已經喺香港落實，可以執行。相信這條法例可以止暴制亂，令香港回復到從前的繁榮安定。我們不談政治，只從經濟角度看。在新型冠狀病毒及社會事件影響下，從去年六月到今天，已經超過一年。而在過去一年時間雙重打擊下，遊客絕跡，飲食業、服務業嚴重受到重創。從前有一句說話，得據點，得天下。在今天就變成倒閉的源頭，因為你個位置越靚，租金就越貴。如果你係簽長租約，而係生意急轉直下嘅情況底下，冇辦法防守。可以話千年道行一朝喪，過去十幾年累積賺回來的錢，喺呢一年全部輸晒，一鋪清袋！看到舖位受到嚴重嘅衝擊，反觀住宅就相對穩健，特別係一千萬樓下嘅住宅上車盤，價格在過去一年不跌反升。說一個具體嘅例子，三個月前你購入市區一個市價六百萬的單位，到今天最少已經升幅了10%。而超級豪宅方面就出現少量大幅劈價個案，例如一個何文田豪宅叫價七千四百萬，到賣出係四千七百萬的極端例子，可以看到香港目前樓價係兩極化！

近日有網友問筆者如何看香港嘅樓價走勢。根據過往一年觀察，在雙重疫情下，中下價嘅樓盤因為剛性需求，價格相對硬正，而超級豪宅因為辣椒印花稅嘅關係，多數只有內地嘅朋友願意付30%嘅附加印花稅，但社會事件嚇窒了內地好多人士來港置業，所以影響較為深遠。

在過去一年嘅雙重打擊下，中下價樓都保持平穩，相信未來樓價更加難下跌。但香港樓價會否大升就令作別論。因為目前香港樓價仍然係全世界最貴。反觀世界各地大部份先進國家發達城市，在新型冠狀病毒衝擊下，樓市都遍體鱗傷。不論是歐美澳紐美加等各地的經濟，受到的打擊也非常嚴重！

目前相信全球最有力量推行經濟增長，就係中國。因為有接近十三億六千萬人口嘅內需，去刺激國內嘅經濟。而中國更加係世界嘅工廠，任何人要訂淘寶訂貨，都必須要比錢中國企業賺。相信未來最快回復經濟嘅體系，會是以內需先行的國家。而筆者同時也看好日本的經濟前景。因為過去大半年全球封城，積壓了大量嘅旅遊人士準備去遊山玩水，而日本正正係一個旅遊業先進發達嘅國家。相信喺未來通關之後，日本會有一個巨大嘅反彈，將從旅遊業開始，再激發其他嘅行業蓬勃發展。希望疫情盡快過去，往來世界各地嘅機場盡快可以回復正常。筆者期待可以去日本觀賞紅葉！

作者：楊官華（華記）
林肯大學榮譽管理學博士
2017年世界傑出青年華商
亞洲知識管理學院院士
香港專業地產顧問商會副會長
香港專業教育學院顧主委員會委員
香港僱員再培訓局地產代理界別-技術顧問
世紀21中華物業（香港、日本、澳門）創辦人
香港華記茶餐廳（日本）創辨人